ابزار هدایت به بالای صفحه

دورنانيوز – سرويس توركي : گئجه نين سون چاغلارايدي . سحرين شفقي ياواش- ياواش قارانليغين بوخجاسين بوركوردو. يئر اوزره سي گئتديكجه ايشيق لانيردي . پنجره نين دومان باسميش شوشه سيني بارماقلاريملا سيليب ائشييه باخديم. هاوانين چم ليغي بوداقلارين اوستونده شئح مونجوغو ياراتمشيدي . بير آز گؤزلريمي يوخارئيا قالديرديم. حياط ديواري نين قيرناسيندان، ذيروه سي قارلي داغا گؤزوم ساتاشدي. گون ياواش ياواش ايشيغيني يئر اوزه رينه ساچيردي . داغين چئوره سينده كي گؤيون اوزو سويوقدان قيزارميش اوشاق اوزوكيمي آل – قيرميزي اولموشدو . گئت به گئت گونون شفقي داغين آرخاسيندان يئر اوزه رينه ياييليردي ، بير نئچه ساهات يئني ايل تحويلينه قالماميشدي يعني ۱۳۹۲- جي ايله. قولاغيم سس ده ايدي . آخي ائله اوگئجه يوخودا گؤرموشدوم . بير آغ آتا مينيب، آغ- آبباق پالتار اگنينده ، قارا رنگ لي يان قيليجي شاپكا باشيندا منه قارشي گليردي . سانيرديم گرچك دي . سئوينجدن گؤزلريمين گؤز ياشلاري دامجي دامجي ياناقلاريمدان آخيردي و دوداقلاريمين قيراغيندان دئمه ياسديغين اوزه رينه تؤكولوردو. بير آن يوخودان آييلديم. گؤزلريمي سيليب ديواردان آسيلان ساهاتا باخديم. گئجه نين بير ياريسين گؤستريردي . سحر واختينا ائله قالماميشدي. ياتابيلمه ديم . اوتوردوم ديزلريمي قوجاقلاديم. گؤزلريم ديوارداكي شكيلين گؤزلرينه ساتاشدي. سانكي اونون داگؤزلري منيم گؤزلريمه باخيردي. نيسگيل لي بير باخيش. باخيشلاريندا بير دونيا معنا قالانميشدي و گؤردويوم يوخونو بير داها خاطيرلاديم ، اوره ييم ديليمدن قاباق ديله گليب سيزلئيا ، سيزلئيا سؤيله ييردي هارداسان ؟ ندن مني يالنيز بوراخيب گئتدين؟ من سندن دويمادان، نه تئزمندن دويدون ؟ مه يه قرار دئييلدي منه داياق اولاسان ؟ اليمدن ياپيشيب، ييخيلماقدان قوروياسان؟ اولمايا فلك سندن دويموشدو؟…
آرزيلاريم بير بير گؤزومون اؤنوندن صفه دوزولوب رژه گئديرديلر. كيرپيك لريم گؤزلري مين دامجي لاريني سيخيب، ياناقلاريمدان بيلك لريمين اوزه رينه آخديريردي . كئچن گونلريم ياديما دوشدو. ان اوشاقليق خاطيره لريم. ائله بيل ائله دونن ايدي. بالاجا ائويميزين قاپيسي دؤيونن زامان، گؤزله مه دن، قاپي يا ساري قوش گئديرديم. قاپيني آچاركن اوزوم ساتاشيردي سئوگي ايله دولو اولان گؤزلرينه ، اؤزومو آتيرديم اونون مهربان قوجاغينا. گولر اوزله يورولموش قول لاريني منيم بوينوما حلقه ائديردي باغرينا باسيردي. سويوق دوداقلاري لا ياناقلاريمدا اوپوش چيچه يي اكيردي . آتاليق دويغوسو ائله بيله ايميش. بيليرسيز! بو دويغونو دريندن حيس ائديب آنلئييرديم . آي آللاه دونيانين ان سئويملي آتاسي ائله منيم آتام ايدي . هئي …. اوگونلر نه تئز كئچدي ، گئتدي.
من بؤيودوكجه آتام دا ياشلانيردي. زمانه نين قات – قات آغيرليغي گوجلو قول – بيلك لي آتامين بئلين بوركموشدو. زمانه نين آغير دردي و گرگين دورومو آتامين ساچلاريني قيش قاري كيمي آغارتميشدي . سانكي بو آغاريلميش ساچلار اونون هيجران نغمه سيني سسلنديريردي . گونلر، آيلار كئچيردي، ايللر بيتيردي ، آتامين اللري نين اوستونده كي دري لرگون به گون قيريشيردي ، دري نين آلتينداكي ياشيل دامارلار گؤزه چارپيردي . اللري نين ايچي ده، قابار باغلاييب دريسي قات – قات بير بيريندن آيريلانيردي و بوندان دولايي هر گون قئوريشيردي،كاسيب ليق بئليني بوركموشدو و قيافه سي ياشين دان داها ايره لي گؤرسه نيردي .
بيرگون ، بيرگون پاييزين ايلك آيي نين ايلك گونلرينده اورتا مكتب دن ائوه ساري قاييديرديم . كوچه يه گيرن زامان بير آن شوبهه لي منظره يه گؤزوم ساتاشدي. گؤردوم كوچه نين ائني – اوزونو، قوهوم – قونشوي لا دولودور . ايلاهي ندن بير بئله جماعت بيزيم كوچه يه يئغئشيبلار؟ اولمايا…. يوخ ديليم لال…. آمما ائله بيل بو جماعت بيزيم ائويميزين قاپيسينا توپلاشيب لار. اوره ييم اوزولدو… آي آللاهيم نه اوز وئريب ؟ نه اولوب ؟ اولمايا خسته آتاما بير زاد اولوب؟ آخي اؤتن گئجه آتامين ساغلام دورومو ياخشي دئييلدي…
آنام خسته آتاما، قند شربتي حاضيرلاييب وئرميشدي… آتامين رنگي سارالميشدي و دردين گوجلوغونودن باغيريردي . آتامين حزين حزين سسينه يوخودان آييلديم. گؤردوم آنامين بير قولو آتامين باشينين آلتيندا و بير قولويلا اونا شربت ايچيردير. آتامين بئحال گؤزلري منه ساتاشدي. قيزيم نيگران اولما ! منيم هئچ نه ييم دئييل. گئت يئرينده يات. صاباح مدرسه ن بئواختا قالار دييه ر كن مني موتلو ائديردي . بيلميرديم آتامين خسته ليغي ندن دير؟ آمما نييه دوقتور دئميشدي، اونون اوره ك خسته ليغي وارايدي . آمما آخي اونون پاك اوره يي ندن خسته لنه؟ بيلميرديم باشيمدا چيخميردي . آخي ياشيمدا اوقدر دئييلدي كي دوقتور دئدي ييني آنلئيام. سونرالار آنام دان سوردوم و بيلديم كي آتامين سرطان خسته ليغي واريميش. كاسيب ليغين اوزو قارا اولسون. پولسوزلوق آدامين باشينا نه لر كي گتيرمير .پولوموز اولمادان، آتام خسته ليغي نين قارشي سيندا داوام گتيرمه دن دونياسين دئييشميشدي.
نه ايسه قاپي نين اؤنونده دوردوم ايچه ري گيره بيلمديم يعني ان دوغروسوآياقلاريمدا طاقت قالماميشدي. آنام تورپاقلاري باشينا چؤوورركن اي واي ائويم يئخيلدي آللاه ، باشيما كول اولدو دئييردي. عزالي آنام يانيق يانيق آغلاييردي. گؤزلري منه ساتاشاركن داهادا آرتيق دويغولاندي ، سسيني قالديردي ….
چانتام اليمدن اوزولوب يئره دوشدو…. بير بوز قنديلي كيمي يئريمده دؤندوم، بئينيم ايشدن دوشدو. اوره ييم چيرپينماقدان داياندي ، قوللاريم سينيق بوداق كيمي چينيمدن آسلاندي . ديليم توتولدو… يازيق اولان منم آللاه؟ ائوي ييخيلان منم آللاه؟ آتام اليمدن گئتدي ….؟او خسته آتام … او گولر اوزلو آتام …. اللري قابارباغلميش آتام …
آنام منه قارشي گليب مني باغرينا باسدي ، آتان اليميزدن گئتدي قيزيم دئدي . اومودوموز كسيلدي! آنامين گؤز ياشلاري مدرسه دونومو ايسلاديردي . ايكي قولومو آنامين بوينونا حلقه لنديرديم گؤزلريم سانكي ياز بولودو اولموشدو . آنام آغلاركن اوخشاييردي ، من ده يانيق يانيق آغلاييرديم . اينانا بيلميرديم …
آتاجان قوربانين اولايديم . آتاجان قاباريلميش اللرينه قوربان اولايديم …. گؤزلري نين قوربان اولايديم . يارالي ، خسته اوره يي يين قورباني اولايديم . ندن بيزي يالنيز بوراخدين گئتدين ؟ ندنسه مني آغلار قويدون گئتدين ؟ نئجه آتاسيز دؤزوم؟ نئجه آتاسيز عؤمرومو سوروم ؟ كاش سنين يئرينه من اؤله ايديم ….
بو حال دا قونشو- قوهوم لار، آتامي قارا پتويا بورويوب ، قاپيدا ساخلانميش آمبولانسا ساري آپاريرديلار. اؤزومو آنامدان اوزدوم آتامين جنازه سي نين آرخاسي جا قاچديم. هارا آپاريرسيز؟ من حله آتامدان دويماميشام ! من ده آتام لا گئديرم دئديم. قوهوم – قونشو مني آتامين روح سوز بدنيندن آييرديلار . اونلاري آندا وئرديم ، قويون لااقل بير دفه يالنيز بير دفه گولر اوزلو آتامين چؤهره سينه باخيم و دوداقلاريندان اؤپوم…
دوداقلاريمي قويدوم سويوق دوداقلاري نين اوستونه، اللريمي آغاريلميش ساچلاري نا چكيب سولموش ياناقلاريندان اؤپوب ، حزين حزين آغلاديم . گؤزومون دامجيلاري آتامين اوزونو ايسلاتدي . بو منيم سون گؤروشوم اويدو. بيليرديم بوندان بري آتام قات – قات تورپاقلارين آلتيندا ياتيب ، دينجه له جك و من گؤره بيلمه يه جم. اؤپدوم ، ياناقلاريندان ، گؤزلريندن و قيريشميش آنليندان اوپوردوم ، آغلاييرديم. قوهوملار قوللاريمدان توتوب قيراغا چكديلر. اينانميرديم . سانكي بير يوخواويدو، بير خيال ، بير رؤيا . آمما نئچه گوندن سونرا بيلديم كي گرچك ايدي . آتامين اؤلومو دوغرويموش هه يه . من آتاسيز قالديم. آتاسيزليق نئجه سؤيله ييم دهشتلي بير درد . آتاسيزليق ، يالنيزليق دير. آتاسيزليق ، ديرك سيزليق ، داياق سيزليق. آتا يعني سئوگي، آتا يعني ايستك ، آتا يعني قيزين داياغي ، آتا يعني قيزين ديره يي . آخي او منيم گوجلو ديره ييم ايدي. نه منيم ، ائله آنامين دا.
هيجران اودو تام وجودومو آليشديردي . هيجران دردي يامان درددي . چاره سيز بير درد جان يانديريجي بير اولاي . آمما حه له ده اينانا بيلميرم كي آتام مني ترك ائديب دي . ائله يئنه ده قولاغيم سس ده . ائله دئييرم آتام قاپيني دؤيوب بيرده ائوه دؤنه جك دير . آتامين يورقون حاللي آمما گولر اوزولو چؤهره سيني بيرداها گؤره جه يه م . مني يئنه ده باغرينا باسيب اؤپه جك دير. دويغولاريني تام وجودوم لا حيسّ ائده جه يم… هئي … آمما بونلار هاميسي خيالدير كاش گرچك له شردي …
هر ايلين سونوندا و يئني ايل تحويل اولاندان سونرا اوره ييم چيرپينير، آنامدان گيزلين گئديرم اؤز اوتاغيمدا ديزلريمي قوجاق لاييب آتامين ديواردان آسيلان شكلينه باخيب خيسين خيسين آغلاييرام، اؤز اؤزومه دئيرم نه اولاردي منيم آتام دا كناريميزدا اولاردي ، آخي نوروز بايرامي ياخينلاشير مني ده آپاراردي بازارا بايرام پايي آلاردي . بيليرسيزمي ائله بو چاغ لاردا آتاملا بيرليكده گئدرديك بازارا ايكي جوت قيرميزي بالاجا باليق آليب سالارديك تونگه و …
ايل تحويليندن سونرادا بايرامين ايلك گونونده مني باغرينا باسيب بايرامليق وئرردي … آمما ايندي نه … ؟
ثانيه لر هر بيريسي منه بير ايل گلير. ايندي ايسه هر زمانان ايل بايرامي گلير، اوره ييم دؤيونور، سيخيلير، داريخير ، ازيلير… ندنسه بايرامين داخي منه معناسي يوخدور . ياز فصلي هر زامان منه پاييزدير. آخي بيليرسيز آتامي سون بهاردا الدن وئرديم . خزان يئلي آتامين عؤمرونو اليندن آلدي . ان دوغروسو منيم اليمدن آلدي.
ايللر بو اولايدان گئچيب آمما هله گؤزلريم يئنه ده قاپي نين اؤنون ده دير . هر آن قاپي نين سسيني اؤزلويرم و آتامين گلمه سي ني گؤزلويرم.
ايندي ده گؤزوم قاپينين آرخاسيندادير بيليرم كي بيرنئچه ساهات دان سونرا، ايل ته زه له نه جك دير.
گؤزوم گؤزونو گؤزله يير، آتاجان هارداسان گل … كؤنلو سينيق قيزين يولونو گؤزله يير… آتاجان هارداسان گل… هيجران آتشي كؤنلومو آليشديردي هارداسان گل آتاجان… هاردا سان گل ….
سؤزلوك: شئح مونجوق = شبنم قيرنا = لبه ذيروه = قله ساچماق = تاباندن
چئوره = اطراف ، پيرامون شاپكا = نوعي كلاه گرگين دوروم = وضعيت نامناسب
توپلاشماق = تجمع چانتا = كيف (كيف مدرسه) ديرك = ستون
نويسنده : مهندس اسفنديار سپهري نيا